काठमाडौँ, ०१ जेठ। प्रधानमन्त्री केपी शर्मा ओलीले संसद्मा आफूले गैह्रसंसदीय शब्द प्रयोग नगरेको दावी गरेका छन्। बरु अरुले प्रयोग गरेका उत्ताउला, अमर्यादित र असंसदीय शब्द सभामुखले अभिलेखबाट हटाएको उनले बताए। भियतनाम र कम्बोडियाको एक साताको औपचारिक भ्रमण पूरा गरी स्वदेश फर्केपछि बुधबार पत्रकारहरुसँग कुराकानी गर्दै प्रधानमन्त्री ओलीले भने, ‘संसद् मर्यादित थलो भएकाले यसको मर्यादा राख्नुपर्छ भन्नेमा म आफू स्पष्ट छु। विगतमा सामन्ती संस्था हुँदा त्यसको मर्यादा राख्नुपर्छ, भन्नेहरु अहिले गणतन्त्रका आधारभूत संस्था र राज्यका सर्वाेच्च निकायमाथि अपमान हुँदा चुप लागेका छन्। मुलुकको सर्वाेच्च संस्थालाई अपमान गरेर बहादुरी ठान्ने प्रवृत्ति गणतन्त्रमाथिको हमला हो। यो अनाहक र अनुचित ढङ्गले आएको छ।’
सरकारको आर्थिक वर्ष २०७६÷७७ को नीति कार्यक्रममाथि सांसद्ले उठाएको प्रश्नमाथि प्रतिनिधिसभामा जवाफ दिने क्रममा गत बैशाख २४ मा प्रधानमन्त्री ओली र प्रमुख प्रतिपक्षी सांसद्बीच दोहोरी चलेको थियो। सभामुख कृष्णबहादुर महराले बैशाख २७ गतेको बैठकमा प्रयोग भएका सबै असंसदीय अभिव्यक्ति अभिलेखबाट हटाउन सचिवालयलाई निर्देशन दिएका थिए। राष्ट्रपति विद्यादेवी भण्डारीले बैशाख २० गते नीति तथा कार्यक्रम प्रस्तुत गर्दा प्रयोग भएको ‘मेरो सरकार’ शब्दावलीप्रति कतिपय विपक्षी सांसद्ले व्यंग्य गरेकामा प्रधानमन्त्री ओलीले भने, ‘त्यसो गरिनु अशोभनीय हो।’
संसद्मा हालै दर्ता भएका केही विधेयकमा उठेका प्रश्नबारे प्रधानमन्त्री ओलीले नेपाली समाजलाई आधुनिक, विकसित र सभ्य बनाउन समाजले कानूनको आफैँ परिपालना गर्ने अभ्यासमा जानुपर्नेमा जोड दिए। ‘सरकारले अघि सारेका विधेयकबारे संसद्मा छलफल हुनुपूर्व बाहिर फरक रुपमा व्याख्या वा दस्तावेज च्यात्ने कार्य ठीक भएन,’ उनले भने, ‘ती विधेयकलाई संसद्ले यथोचित रुपमा पारित गर्नेमा म विश्वस्त छु।’ सरकारले हालै राष्ट्रियसभामा दर्ता गराएको मिडिया काउन्सिल विधेयकबारे नेपाल पत्रकार महासंघले विरोध गर्दै आएको छ।
‘असभ्यतालाई बहादुरी ठान्नु समाजका लागि चुनौती हो,’ प्रधानमन्त्री ओलीले भने, ‘विधेयकहरुमा छलफल र परिमार्जन गर्न सकिन्छ। आवेग र उत्तेजनामा आउनु आवश्यक छैन। सरकारले कुनै पनि कानून हचुवाका भरमा ल्याउँदैन। आक्रोशपूर्ण, निराधार र अनुचित कुराहरुले समाजलाई विकृतितर्फ लैजान्छ।’ वर्तमान सरकार जननिर्वाचित सरकार भएकाले यसलाई कोष्ठभित्रको ‘कम्युनिष्ट’ सरकार भनेर कुटिल व्याख्या नगर्न पनि उनले आग्रह गरे।
भ्रमण उपलब्धिमूलक
स्वदेश फर्केपछि प्रधानमन्त्रीबाट ओलीबाट जारी विज्ञप्तिमा ती मुलुकबीचको द्विपक्षीय सम्बन्ध थप विस्तार भएको र नेपालको छवि अन्तरराष्ट्रिय जगत्मा थप उज्यालो भएको बताइएको छ। प्रधानमन्त्री ओली समाजवादी गणतन्त्र भियतनामका प्रधानमन्त्री गुएन सुआन फुकको निमन्त्रणामा गत बैशाख २६ देखि ३० सम्म भियतनाम र त्यसपछि कम्बोडियाका प्रधानमन्त्री सम्देह अक्का मोह सेना पडेइ टेको हुन सेनको निमन्त्रणामा कम्बोडिया भ्रमण सकी बुधबार स्वदेश फर्किएका हुन्।
भियतनामसँग हवाई सम्झौता, आर्थिक, व्यापार र लगानी, पर्यटनका क्षेत्रमा सहकार्यका लागि गहन छलफल र सम्झौता भएको प्रधानमन्त्री ओलीको भनाइ छ। आफूले भ्रमणका क्रममा गौतम बुद्धको जन्मस्थल र बौद्ध दर्शनको उद्गमस्थल नेपाल भएकाले लुम्बिनीमा अन्तर्राष्ट्रिय बौद्ध सम्मेलन आयोजनाका लागि प्रस्ताव गरिएको बताए। -रासस
