गुल्मी, ०३ जेठ। दुई महिनाकी नवजात शिशुको हत्या गरेको अभियोगमा गुल्मी प्रहरीले शुक्रबार शिशुकी आमालाई पक्राउ गरेको छ। गुल्मी दरबार गाउँपालिका–४ की ३५ वर्षीया जुना विकलाई प्रहरीले पक्राउ गरेको हो।
आमाको काखमा रहेकी मृत शिशुलाई आफ्नै आमाले हत्या गरेको हुन सक्ने आशङ्कामा उनका परिवारले प्रहरीलाई खबर गरेपछि जुनालाई नियन्त्रणमा लिएर घटनाका बारेमा आवश्यक अनुसन्धान सुरू गरेको जिल्ला प्रहरी कार्यालय गुल्मीका प्रहरी नायव उपरीक्षक मीनबहादुर घलेले बताए।
मृतक शिशुको शरीरमा कान नजिकै सामान्य चोट देखिएको हुँदा शव परीक्षण र आमाको बयानपछि थप अनुसन्धान गरी घटनाको सत्यतथ्य बाहिर ल्याउने प्रहरीले जनाएको छ। शिशुको शव परीक्षणका लागि जिल्ला अस्पताल गुल्मीमा राखिएको छ।–रासस
