पाँचथर, ०७ जेठ। पाँचथरमा दुई परिवारका ९ जनाको हत्या भएको छ। मिक्लाजुङ गाउँपालिका ३, आरूबोटे भन्ने स्थानमा दुई परिवारका ९ जनाको हत्या भएको जिल्ला प्रहरी कार्यालय पाँचथरले जनाएको छ। प्रहरीका अनुसार एक बालिका घाइते भएकी छन्। घाइते बालिकालाई उपचारको लागि अस्पताल लगिएको छ।
जिल्ला प्रहरी कार्यालय, पाँचथरका प्रहरी निरीक्षक अनिल पौडेलका अनुसार घटनाबारे जानकारी पाएकोले प्रहरी घटनास्थलतर्फ गइसकेको छ। प्रहरीका अनुसार हत्या एकदमै विभत्स छ। तर, हत्या कसले, किन गर्यो भन्ने खुलेको छैन। घटनाबारे प्रारम्भिक जानकारी आएकोले नजिकैको इलाका प्रहरी कार्यालयसँगै जिल्लाबाट घटनास्थलतर्फ टोली खटाइसकिएको उनले बताए। ‘तर, घटनास्थल नपुगी थप केही भन्न सक्ने अवस्था छैन,’ उनले भने।
