काठमाडौँ, ०४ भदौ। काठमाडौंको एक होटलमा एक जोडी मृत अवस्थामा भेटिएका छन्। महानगरिय प्रहरी वृत्त महाराजगञ्जले दिएको जानकारी अनुसार नयाँ बसपार्कको मोरङ पर्वत गेस्ट हाउसको कोठा नं. १११ मा चितवनका ३७ वर्षीय यमबहादुर मगर र मकवानपुरकी ३० वर्षीया सबिता भनिने सबिना बजगाईं मृत भेटिएका हुन्।
घटनास्थलको प्रारम्भिक मुचुल्का उठाएर अनुसन्धान थालिएको प्रहरी वृत्तका डीएसपी फणिन्द्र प्रसाईंले जानकारी दिए। कट्टु मात्र लगाएको अवस्थामा युवतीको शव खाटको तलपट्टी र युवकको खाटमाथि भेटिएको उनले बताए। ‘तर, कसरी मृत्यु भयो भन्नेबारे छानविन भइरहेको छ,’ उनले भने।
मंगलबार राति ११ बजे होटलमा बसेका उनीहरू बिहान खान खान बोलाउँदा नआएपछि होटल सञ्चालकले प्रहरीलाई खबर गरेका थिए। दिउँसो १ बजेपछि प्रहरी आएर होटलको ढोका खोल्दा नग्न अवस्थामा मृत भेटिएका थिए।
उक्त कोठाबाट प्रहरीले मदिराका बोतलहरु समेत बरामद गरेको छ। अहिले घटनास्थलमा फरेन्सिक विज्ञको टोली खटाइएको प्रहरीले जनाएको छ। परिवारलाई खबर गरेपछि त्रिवि शिक्षण अस्पताल, महाराजगञ्जमा दुवैको पोष्टमार्टम गरिनेछ। पुरुष र महिला दुवै विवाहित भएको प्रहरी अनुसन्धानले देखाएको छ। महिलाका श्रीमान् वैदेशिक रोजगारीका लागि खाडी मुलुकमा छन्।
