चितवन, पुस १९ । नेपाली कांग्रेसका वरिष्ठ नेता रामचन्द्र पौडेलले पार्टी सभापतिले सबै नेता तथा कार्यकर्तालाई समेटेर अगाडि बढ्नुपर्ने बताएका छन्। रत्ननगर नगर समितिले शनिबार चितवनको टिकौलीमा आयोजना गरेको कार्यकर्ता भेटघाट कार्यक्रमलाई सम्बोधन गर्दै पार्टीका वरिष्ठ नेता पाैडेलले पार्टीभित्र विकृति मौलाउन दिन नहुनेमा जोड दिएका हुन्नु। ‘सभापतिका कारण पार्टी कमजोर बन्नु हुँदैन,’ उनले भने, ‘व्यक्तिगत स्वार्थमा कोही लाग्नु हुँदैन, पार्टी बलियो भएमात्र सबै बलियो हुन्छ।’
पार्टीलाई रोगमुक्त बनाउन आफूले नौबुँदे सुझाव पेश गरेको भन्दै त्यसलाई कार्यान्वयनमा ल्याउन सभापतिसँग आग्रह गरे। कांग्रेस केन्द्रीय सदस्य प्रदीप पौडेलले पार्टी कब्जा गर्ने नभई सत्ता कब्जा गर्ने गरी नेतृत्वले काम गर्नुपर्ने बताए। कांग्रेस रत्ननगर नगर समिति सभापति रुपनराज घिमिरेको अध्यक्षतामा भएको कार्यक्रममा कांग्रेस केन्द्रीय सदस्यद्वय डिना उपाध्याय, कमला पन्त, चितवन सभापति जीतनारायण श्रेष्ठलगायतले मन्तव्य राखेका थिए। कार्यक्रममा विभिन्न विधाबाट १२ जना तथा पार्टी पूर्वनगरसभापति चार जनालाई सम्मान गरिएको थियो। रासस
