काठमाडौं, पुस २१ । १ सय २२ चिनियाँ नागरिकको राहदानी चिनियाँ दूतावासले रद्द गर्ने भएको छ। भिसाको दुरुपयोग गरी शंकास्पद गतिविधि गरेको भन्दै उनीहरु पुस २२ गते काठमाडौंबाट पक्राउ परेका थिए।
उनीहरूका राहदानी एकमुष्ठ रद्द गरी नयाँ ट्राभल डकुमेन्ट जारी गर्ने तयारी दूतावासले गरेको स्रोतको दाबी छ। पक्राउ परेका मध्ये ९६ जनाको राहदानी नभएको र बाँकी २६ जनाको राहदानी प्रहरीसँग रहेको छ।
पक्राउ परेका तर राहदानी भएकालाई ट्राभल डकुमेन्टका आधारमा चीन फर्काउने तयारी गरिएको छ। त्यसका लागि दूतावासले प्रहरीसँग समन्वय गरिरहेको छ । ट्राभल डकुमेन्टमा भिसा नियमित गरी पक्राउ परेका सबैलाई बुधबार चीन फर्काइने तयारी रहेको छ।
काठमाडौंमा पक्राउ परेका आफ्ना नगरिकलाई चीनले जैजाने भएको छ। उनीहरुलाई बुधवार दुईवटा चार्टर विमानमार्फत लैजाने तयारी चीनले गरेको छ।
चीनले चाइना साउदन र चाइना वेस्टर्न नामका दुई विमान मार्फत उनीहरुलाई लैजाने तयारी गरेको छ। ती जहाज अवतरण गराउन दूतावासले नागरिक उड्डयन प्राधिकरणबाट अनुमति लिएको स्रोतको भनाइ छ।
नेपाल प्रहरीले चीनसँग समन्वय गरेर गत पुस ७ गते काठमाडौंमा संयुक्त अपरेशन गरी अवैध गतिविधमा संलग्न रहेको आशंकामा बालाजु आसपासका क्षेत्रबाट एकै दिन १ सय २२ जना चिनियाँ नागरिकलाई पक्राउ गरेको थियो।
