धनुषा, पुस २६ – धनुषामा उत्खननको विरोध गर्ने दिलिप कुमार महतोको हत्या गरेको आरोपमा चुरियामाई बालुवा प्रशोधन केन्द्रका सञ्चालक विपिन कुमार महतो पक्राउ परेका छन्।
विपिनलाई जनकपुरधाम उपमहानगरपालिका–१ भानुचोक नजिकबाट शनिबार बिहान पक्राउ गरिएको प्रहरीले जनाएको छ।
उनलाई बिहान १० बजे नियन्त्रणमा लिएको ईलाका प्रहरी कार्यालय ढल्केवरका प्रहरी निरीक्षक रामकुमार यादवले जानकारी दिएका छन्। प्रहरीले शुक्रबार नै दिलिपका साथी रोशन यादव र टिप्पर चालक मुनिन्द्र महतोलाई पक्रेको थियो।
शुक्रबार बिहान करिब ४ बजे नदीमा भइरहेको अवैध उत्खननलाई रोक्न जाँदा दिलिप भन्ने ओमप्रकाश महतोको टिपरले किचेर हत्या भएको थियो। परिवारजनले क्रसर सञ्चालक विपिन महतोसहित स्थानीय प्रशासन, वडाध्यक्ष लगायतको संलग्नतामा हत्या गरेको आरोप लगाउँदै आएका छन्।
दिलिपको शव अहिले प्रादेशिक अस्पालमा छ। परिवारजनले प्रहरीमा जाहेरी नदिएकाले शवको पोस्टमार्टम नगरिएको प्रहरी निरीक्षक यादवले बताए।