काठमाडौं, पुस २९। कार दुर्घटनामा परी गायक निशान भट्टराइको निधन भएको छ। गएराति काठमाडौंको दरबारमार्गमा रहेको वान थाई रेष्टुरेन्टबाट आफ्नो नियमित गायन प्रस्तुती सिध्याएर फर्किने क्रममा आफैंले चलाएको कार तीनकुनेमा दुर्घटनामा परेको थियो।
गम्भीर अवस्थामा रहेका उनलाई उपचारका लागि ट्रमा सेन्टर लगिएको थियो। ट्रमा सेन्टरमा उपचारकै क्रममा उनको मृत्यु भएको प्रहरीले जानकारी दिएको छ।
गायक भट्टराईको ‘कामनाले भरिएको’ पहिलो गीत हो। दीर्घ सिंह बमको रचनामा उनले पहिलो गीत रेडियो नेपालमा गाएका थिए। ‘माया गर माया गर’ उनको अर्को लोकप्रिय गीत हो। यसमा महिला स्वरमा सुकमित गुरुङले भट्टराईले साथ दिएकी छन्। उनको अर्को लोकप्रिय गीत ‘हेर धर्ती’ हो।
गजल गायकीका कारण उनी चर्चित थिए । स्टेजसँगै होटल रेस्टुरेन्टहरूमा उनले गजल गाउँदै आइरहेका थिए। धरान स्थायी ठेगाना भएका भट्टराई गायिका लोचन भट्टराईका भाइ हुन् ।
