फागुन ७ । भारतीय गायिका नेहा कक्कड र हिमांश कोहलीको ब्रेकअप भएको १४ महिना बितिसकेको छ। तर उनीहरु बीचको सम्बन्धमा पुनः तनाव देखिएको छ। हुन त नेहा आफ्नो सम्बन्ध टुटेकोमा थुप्रै कार्यक्रममा रोइरहेको देखिएकी थिइन्। उनको यस्तो व्यवहार देखेर हिमांशले नै उनलाई धोका दिएको भन्ने अनुमान गरिएको थियो। अब यी सबै विवादमाथि हिमांश कोहलीको जवाफ आएको छ जसलाई सुनेर नेहा कक्कड निकै कडा रुपमा प्रस्तुत भएकी छिन्।
नेहाले इन्स्टाग्राममा एउटा लामो पोस्ट सेयर गरेकी छिन्। उनले निकै घुमाउरो शैलीमा हिमांशमाथि उनको इमेज खराब गरेको आरोप लगाएकी छिन्। नेहा लेख्छिन्, ‘जसले मेरा बारे नराम्रो भनिरहेका छन्, उनीहरु झुटा हुन् र मेरो सफलता देखेर डाहा गरिरहेका छन्। उनीहरुलाई मेरो नाम लिएर मिडियामा आउनु छ। पहिला पनि यस्तै गरिएको थियो। मेरो पछाडि पनि यस्तै गरियो। यदि चर्चित हुन मन छ भने आफ्नो कामबाट बन मेरो नामबाट होइन।’
नेहाले आफ्नो पोस्टमा एकपटक पनि हिमांशको नाम लिइनन् तर उनले उनकै लागि यस्तो लामो पोस्ट लेखेको स्पष्ट हुन्छ। नेहा यत्ति भनेर मात्रै रोकिइनन्। उनको हिमांश कोहलीविरुद्धको रिस स्पष्ट देख्न सकिन्थ्यो। उनले हिमांशको पूरा परिवारकै पर्दाफास गर्न सक्ने बताएकी छिन्।
नेहा लेख्छिन्, ‘यदि मैले मेरो मुख खोल्न सुरु गरेँ भने म तिम्रो आमा, बुवा र बहिनीको कर्तुत पनि सार्वजनिक गरिदिनेछु। उनीहरुले ममाथि कस्तो व्यवहार गरेका थिए, मलाई के–के भनेका थिए। मेरो नाम प्रयोग गरेर आफूलाई बिचरा बनाउने कोसिस नगर। मबाट टाढै बस र मेरो नामबाट पनि।’
स्मरण रहोस्, हिमांश कोहलीले हालै नेहासँगको ब्रेकअपबारे मुख खोलेको थिए। उनले उक्त ब्रेकअप पछि उनलाई संसारले नै भिलेनमा रुपमा हेरिएको बताएका छन्। उनले भने, ‘कसैले पनि वास्तविकता के थियो भनेर जान्न चाहँदैनथ्यो र म भिलेन बनेको थिएँ। यसले मलाई निकै तनावमा पारेको थियो। मैले केही पनि भनेको थिइनँ र मानिसहरुले आ–आफ्नो निष्कर्ष निकाल्न थालेका थिए, उसले भनेको कुरालाई आधार बनाएर।’
हिमांशको यही बयानपछि नेहा कक्कडको रिसको पारो सबैभन्दा माथि पुगेको छ। उनले हिमांश र उनको परिवारलाई नै तथानाम भनिन्। एजेन्सी
