फागुन १४ । रुसी वायुसेनाको सहयोगमा सिरियाली सेनाले मुलुकको इडलिब प्रान्तमा विद्यालय तथा अस्पताल लक्षित हवाई आक्रमणबाट कम्तीमा २० सर्वसाधारण मारिएका छन्।
आक्रमणबाट दर्जनौं घाइते भएका छन्। सिरियन अब्जरभेटरी फर ह्युमन राइट्सका अनुसार मारिनेमा एक विद्यार्थी र अरु तीन शिक्षक समेत छन्।
मंगलबार सिरियाली विद्रोहीको नियन्त्रणमा रहेको इडलिब प्रान्तमा सिरियाली सेनाले हवाई आक्रमण गरेको हो।
सिरियाली सेनाले इडलिब प्रान्तको राजधानी इडलिब शहर र त्यसआसपासका बस्तीमा व्यापक हवाई आक्रमण गरेको सिरियाली युद्धको अनुगमन गरिरहेको संस्था सिरियन अब्जरभेटरी फर ह्युमन राइट्सले जनाएको छ।
त्यस्तै, इडलिब शहरबाट उत्तरमा रहेको मरात मिस्रिन शहरमा गराइएको हवाई आक्रमणमा १० सर्वसाधारण मारिएका छन्।
त्यसबाहेक बिन्निस शहरमा गराइएको हवाई कारवाहीमा आमा र दुई बच्चासहित ४ जनाको ज्यान गएको राइट्सका प्रमुख रामी अब्देलरहमानले जनाएका छन्।
त्यस्तै, युनियन अफ मेडिकल केयर एण्ड रिलिफ अर्गनाइजेशन नामक अर्को संस्थाले हवाई आक्रमणका क्रममा दुई नर्सरीसहित १० विद्यालय र इडलिब केन्द्रिय अस्पताल क्षतिग्रस्त भएको उल्लेख छ।
पछिल्लो समय सिरियाली सेना र विद्रोही पक्षबीच इडलिब प्रान्तका विभिन्न मोर्चामा व्यापक भीडन्त भइरहेको छ।
हालैमात्र विद्रोहीको प्रत्याक्रमणमा सिरियाली सेनाले इडलिब शहरबाट केही किलोमिटरको दूरीमा रहेको नयरब शहर गुमाएको थियो। सिरियाली विद्रोहीले नजिकैको शरकिब शहरतर्फ आक्रमणलाई चर्काएका छन्।
केही साताअघि मात्रै रुसी वायुसेनाको सहयोग तथा इरानी लडाकु र लेबनानी शिया समूह हेज्बोल्लाहको सहयोगमा सिरियाली सेनाले इडलिब प्रान्तको विशाल भूभाग विद्रोहीको कब्जाबाट आफ्नो नियन्त्रणमा लिएको थियो।
