कार्तिक १९, २०८१
लोकप्रिय एआई च्याट प्लाटफर्म च्याट जीपीटी निर्माता कम्पनी ओपन एआईले अन्ततः च्याट जीपीटीमा एउटा बहुप्रतिक्षित फिचर ल्याएको छ । कम्पनीले च्याट जीपीटीमा रियल टाइम सर्च फिचरलाई आबद्ध गरेको हो ।
ओपन एआईको उक्त कदमसँगै कम्पनीले माइक्रोसफ्ट कोपाइलट र गुगल जेमिनीलाई कडा टक्कर दिनेछ । खासगरी सर्च इन्जिन बादशाह गुगललाई यो सबैभन्दा ठूलो टाउको दुखाइको विषय बनेको छ ।
यद्यपि हालका लागि यो फिचर च्याट जीपीटीका प्रिमियम अर्थात् सशुल्क प्रयोगकर्ताका लागि मात्रै उपलब्ध हुनेछ । तर, निकट भविष्यमै यसलाई च्याट जीपीटीको नि:शुल्क भर्सनमा समेत लञ्च गरिने योजना कम्पनीको छ।
यो फिचरको मद्दतले प्रयोगकर्ताहरुले च्याट जीपीटीबाट आफूले चाहेका अद्यावधिक जानकारीहरु सर्च गरेर प्राप्त गर्न सक्नेछन् । साथै यसमा प्रयोगकर्तालाई निकै तीव्र गतिमा हरेक सबालको जवाफ प्राप्त हुनेछ ।
ओपन एआईले यो फिचरको नाम च्याट जीपीटी सर्च राखेको छ । जब तपाईंले च्याट जीपीटी खोल्नुहुनेछ त्यहाँ टेक्स्ट बक्समै वेब सर्चको पनि अप्सन देखिनेछ । ओपन एआईका अनुसार च्याटबटको सबैभन्दा पछिल्लो संस्करणले रियल टाइम जानकारी प्राप्त गर्न तथा प्रवाह गर्न सक्दछ । त्यहाँबाट प्रयोगकर्ताले समाचार, शेयर मूल्य, खेलकुदको अपडेट जस्ता सबै खालका जानकारी हासिल गर्न सक्नेछन् ।
कसरी काम गर्दछ यो फिचरले ?
ओपन एआईले सर्चका लागि छुट्टै प्रडक्ट लञ्च गरेको छैन । तथापि यसलाई एउटा फिचरका रुपमा विद्यमान च्याट जिपिटीमै जोडिएको छ ।
कम्पनीले यसलाई च्याट जीपीटी ४ को उत्कृष्ट भर्सन बताएको छ जसले कठिन कामलाई पनि सजिलैसँग सम्पादन गर्न सक्दछ । साथै यसले प्रयोगकर्तालाई राम्रो नतिजा र फलो अप प्रश्नहरुको पनि जवाफ दिनेछ ।
यो मोडेलले प्रयोगकर्तालाई मौसम पूर्वानुमान र स्टक मूल्यदेखि खेलकुदसम्मका जानकारी दिनेछ । प्रयोगकर्तालाई च्याटबटको होमपेजमा डाइरेक्ट ट्याब पनि उपलब्ध हुनेछ ।
कम्पनीले आफ्नो ब्लग पोस्टमा भनेको छ : च्याट जीपीटीले अब वेबमा पहिले भन्दा निकै उत्कृष्ट तरिकाले सर्च गर्न सक्दछ ।
तपाईंले पहिलेभन्दा तीव्र गतिमा जवाफ पाउनुहुनेछ, जुन सम्बन्धित वेब श्रोतका लिंकसँगै हुनेछन् । पहिले तपाईंले यसका लागि कुनै सर्च इन्जिनमा जानु पर्दथ्यो ।
च्याट जीपीटीको यो नयाँ फिचर आइओएस, एन्ड्रोइड र डेस्कटप एपमा उपलब्ध भैसकेको छ । अर्थात् सबै खालका प्लाटफर्मका प्रिमियम प्रयोगकर्ताहरुले यो प्रयोग गर्न सक्दछन् ।
