खानीखोलाबाट तस्करीको ३ किलो सुन हराएपछि भरियाको अपहरण

राजश्व अनुसन्धानको हिरासतमा बसेर छुटेका थिए भरिया

अनुसन्धानमा संलग्न अधिकृतहरुका अनुसार, सुन तस्करीमा संलग्न गिरोहले साउन अन्तिमतिर कन्टेनरको ड्राइभर सिटसँगै रहेको लाइटमा सुन जडान गरेर पठाएको थियो । पहिलो दिन सवारी चालक रामकृष्ण रसुवा र नुवाकोटको आसपासमा आएर बसेका थिए ।

त्यसबेला उनले आफ्ना मामाका छोरा निमा छिरिङलाई सुन लिएर आउँदै गरेको भन्दै खबर गरेका थिए । प्रहरीसँग बयान दिने क्रममा उनले सुन लिएर जाँदा डर लागेका निमालाई खबर गरेको बताएका छन् ।

अनुसन्धानमा संलग्न अधिकृतहरुका अनुसार, निमासँग सल्लाह भएपछि उनी सुन लिएर जाँदा जोखिम हुने बरु प्रहरीलाई खबर गरे सुराकीको कमिसन पाउने निष्कर्षमा पुगेका थिए ।

प्रहरीका अनुसार, त्यसपछि ती व्यक्तिले नेपाल प्रहरीको एक जना प्रहरी सहायक निरीक्षक (असई) लाई यसबारे जानकारी गराएको पाइएको छ । ती असईले राजश्व अनुसन्धान विभागलाई खबर गर्न सुझाव दिएको पाइएको छ ।

‘योजनाअनुसार उनीहरुले राजश्व अनुसन्धान विभाग अन्तर्गत कार्यरत सशस्त्र प्रहरीको टोलीलाई सूचना दिएका थिए’, अनुसन्धानमा संलग्न एक अधिकृतले भने, ‘विभागका डीएसपी सवारी चालकका आफन्त निमालाई लिएर काठमाडौंमा कुरेर बसेका थिए ।’

तर, वाइबाका अनुसार, धादिङको खानीखोलामा आइपुग्दा २ किलो सुन मोटरसाइकलमा आएका व्यक्तिहरुले लुटेर लगे । सुनबिनै आएपछि विभाग अन्तरगत कार्यरत सशस्त्र प्रहरी बलको टोलीले सवारी चालक वाइबा र उनका आफन्त निमालाई पनि नियन्त्रणमा लिएको पाइएको छ ।

उनीहरुले सुन बुझाउन लागेका दुई जनालाई पनि सशस्त्र प्रहरी बलले पक्राउ गरेको भेटिएको छ । सुन नभेटिएपछि ३१ दिन हिरासतमा उनीहरु छुटे । हिरासतमा भइञ्जेल केही समस्या भएन, तर छुटेलगत्तै बाइबा र निमा तस्कर समूहको निशानामा परे ।

सुन लिएर आउने र थाहा भएका व्यक्ति दुई जना मात्र भएकाले तस्करको समूहले सुन खोजी गर्ने सिलसिलामा उनीहरुलाई अपहरण गरेको खुलेको छ ।

प्रहरी स्रोतका अनुसार, उनीहरुले पटकपटक बुढानीलकण्ठको रिसोर्टमा लगेर वाइबालाई यातना दिएको खुलेको छ । उनीसँगै सुन ओसारपसारमा संलग्न अन्य व्यक्तिलाई पनि त्यहाँ राखेर यातना दिएको पाइएको प्रहरी अधिकृतहरुको भनाइ छ ।

यो समुहका लागि सुन ओसारपसारमा सहयोग गर्ने थप ५ जनालाई पनि जबर्जस्ती २०/२० लाख रुपैयाँको चेक काट्न लगाएको पाइएको अनुसन्धानमा संलग्न अधिकृतहरुको भनाइ छ ।

प्रहरीका अनुसार, यो सुनका लगानीकर्ता चिनियाँ व्यक्ति भएको पाइएको छ । उनीहरुले भरिया समूहका एक सदस्यलाई केरुङमै बन्धक बनाएर अरुलाई सुन खोज्न पठाएको समेत अनुसन्धानका क्रममा खुलेको छ ।

असईमाथि छानबिन, ‘डबलक्रस’को शंका

सुनबारे सूचना पाउँदा नेपाल प्रहरीलाई खबर नगरी राजश्व अनुसन्धान विभागतिर पठाउने असईमाथि समेत छानबिन सुरु भएको छ । प्रहरी स्रोतका अनुसार, प्रहरी प्रधान कार्यालयले समिति नै बनाएर ती असईमाथि जाँच गरिरहेको छ ।

अपहरणमा परेका भरिया वाइबाका अनुसार, खानीखोलामा आएका हतियारसहितका अज्ञात व्यक्तिले उनलाई धम्क्याएर सिधै सुन भएको भन्दै दिन भनेका थिए । ‘मैले आफूसँग सुन नभएको बताएको थिएँ, त्यसक्रममा उनीहरुले यहाँ छ भन्दै आफैं लाइटबाट निकालेका थिए’, उनको बयान उदृत गर्दै प्रहरी स्रोतले भन्यो ।

अनुसन्धानमा संलग्न एक अधिकृतका अनुसार, सुन कहाँ लुकाएको छ भन्ने लुट्ने समूहलाई थाहा भएकाले प्रहरी र तस्कर समूहबीच कसैले ‘डबल–क्रस’ गरेको हुनसक्ने शंका छ ।

प्रहरीलाई सूचना पनि दिनेसँगै अर्को समूह प्रयोग गरेर लुटपाट गरेको पनि हुनसक्ने आशंका छ । यद्यपि, हालसम्मको अनुसन्धानले त्यस्तो देखाइसकेको छैन ।

सुन तस्करीका विगतमा भएका कतिपय घटनामा पनि आरोपीले तस्कर र प्रहरी दुवैतिर साँठगाँठ गरेको उदाहरणहरु छन् । सूचना दिने असईले पनि चालक वाइबालाई पटकपटक फोन गरेर कहाँ आइपुगेको भनेर सोधेको विषयलाई पनि अधिकृतहरुले शंकास्पद मानेका छन् ।

दुबईबाट आएको ३३ किलो सुन हराएपछि २०७४ सालमा भरिया सनम शाक्य मारिएका थिए । सुनबारे सूचना निकाल्न मोरङका चुडामणि उप्रेती ‘गोरे’सहितको समूहले सनमलाई चरम यातना दिएको थियो ।

त्यसक्रममा उनी मारिएपछि प्रहरीसम्म खबर पुगेको थियो । पछि यो मामिलामा उच्चस्तरीय छानबिन समिति समेत गठन भयो र एउटै समूहले ३८ क्वीन्टल सुन तस्करी गरेको भेटिएको थियो ।

यो प्रकरणको उच्चस्तरीय अनुसन्धानपछि विमानस्थलमा तस्करहरुको एउटा सेटिङ ध्वस्त भएको थियो । त्यसपछि रसुवा नाकाबाट तस्करीको सुन ल्याउने क्रम बढेको छ ।